返回網站

一個「好」字

broken image

最近呢一個月,體驗過兩次零售的工作經驗,能夠面對面同顧客溝通可以說是獲益良多,因為對住啲樹同對住啲人真係兩個完全唔同嘅世界。當啲客知道我哋嘅故事之後都十分支持我哋嘅產品(當然好食係其中一個主要原因,第二個原因就係佢地清楚知道食物來源,講句唔好聽有咩事起上嚟佢哋都知道去邊度尋仇),甚至有人主動要求同我呢條儍佬合照(令我有飄飄然的感覺)。

基本上會見到兩種客人,第一種隨意執起就擺落個袋度;第二種亦都係最多的一種也是小弟由細到大從阿媽身上學的一種,就是精挑細選後把最「好」的放入個袋度。而今日就係想同大家分享一下什麼叫做「好」。

每個人都一定經歷過童年,係好正常嘅情況之下我哋嘅阿媽都會同我地講:「呀仔,要乖呀!」。當然,對於不忘本嘅我亦都全數將呢句說話送俾我啲女。原因好簡單因為呢句說話係萬能嘅。做晒功課係乖、乾淨係乖、上堂唔傾計專心聽書係乖、阿爸阿媽叫你行東你就行東都係乖......(仲有1萬個conditon)......。阿媽,我知你好錫我,但係你咁樣好屈機姐!

如果將呢個情況擺喺揀「好」水果嘅時候又會點呢?唔使我講,其實大家都心裏有數,始終身體係最誠實嘅。一般人都會揀「大個」,表面「冇花痕」,同埋「顏色鮮艷」嘅。呢個情況係絕對正常,因為香港地執輸行頭慘過敗家,作為一個消費者佢能夠見到嘅就係呢幾樣野。你話係有機?邊個知啊!你話好食?又唔一定有得試食,而且試過食好食唔代表個個都咁好食!所以啲客左揀右揀係人之常情(英文叫 Due Diligence)。

大家試下停一停諗一諗問下自己的「好」是否真的「好」?大=好味?冇花痕=有營養?顏色鮮豔=新鮮? 大家對食物的要求係乜嘢呢?有些生產商為了滿足「大」的要求以用膨大劑,有些生產商為了滿足「無痕」的要求所以用了殺蟲劑,有些生產商為了滿足「顏色鮮艷」的要求而用了保鮮劑。

我無資格教大家咩叫做「好」,我只係希望大家可以跳出框框去諗一諗自己需要D咩。始終大家係香港大,無乜機會接觸農業,所以有很多不了解的地方係好正常(正如作為一個汽車維修員身上有士巴拿亦都係好正常一樣)。

係結束之前我想同大家分享一下關於梨的冷知識。唔知大家有冇聽過人講食梨要食母梨不要食公梨,因為母梨好食啲?(可能聽過食燒鵝髀要食左髀嘅人數會多好多)普遍黎講,母梨係比公梨好食一啲,其實不是味道有什麼分別,只是公梨的心會比較多“粒粒沙”,有啲人會覺得比較硬而且有酸味,特別一些品種例如鴨梨,它的心會比較大,因此就有這個說法。不過市面上大家買到的梨多數都是只有母梨而沒有公梨,可能性有兩個,第一就是農夫把公梨一早已經剪掉,第二就是他們噴了一種藥把梨子變性,因此沒有公梨。下面有條拎大家有時間可以打開睇睇,就是關於這種藥的介紹。至於我嘅睇法就係,如果食水果係追求健康天然的話,就應該接受他的天然(形狀大小不一,顏色不一同埋有天然的痕跡),如果過份追求,反而令目標越來越遠,適得其反。最後問大家一條問題,如果大家去到生果檔見到D梨有公有母,你認為系好定唔好呢?