返回網站

起源·喜緣 (一)

2014年夏天去到新疆庫爾勒旅行,三十幾歲人第一次踏足沙漠,仲要系傳說中的死亡沙漠-羅布泊,果然係好壯觀(仲好熱添),唔怪得余純順都係呢到發生意外。跟住仲參觀左庫爾勒博物館,里面有好多關於絲綢之路嘅歷史,而最震撼嘅就係睇到細嗰時電視節目「絲綢之路」(羅文主唱/鍾景輝配音)介紹嘅千年乾屍。

 

當地見到好多農田,有種棉花、西瓜、哈密瓜、紅棗、枸杞同埋庫爾勒最出名的香梨。去新疆之前一直都聽到啲人話新疆好亂,特別系有關維吾爾族人嘅負面新聞。但機緣巧合之下我去左一個維吾爾族人的農場,雖然大家溝通唔到,但係佢哋好熱情咁招呼我,仲叫我隨便食佢哋種的葡萄。依我觀察,漢人同維吾爾族人的價值觀非常不同,漢人種地會用盡所有方法去提高產量,但係維吾爾族人種地夠食就算。雖然維吾爾族人的產量低,但係佢哋D果樹明顯比看漢人嗰D健康得多,所以「有效的方法不一定冇問題,好的方法也不一定令人接受」。喺農場一帶逗留咗幾日,睇到啲人嘅生活,開始理解到為什麼兩族之間會有矛盾。有一日,睇到有兩個維族人帶住20幾隻羊,佢地問棉花地老闆講可不可以在他地上放羊,因為棉花已經收成,地上只剩下雜草,結果棉花老闆拒絕左佢地。其實諗返轉頭,他們咁多年來都喺度放羊,但係你今日霸左塊地話係自己,斷左佢地生計,又點會冇磨擦呢(情況同阿凡達一樣)?

 

喺旅程途中無意中認識左一位種植香梨的老闆,因為個仔喺上海工作而又準備結婚,所以決定賣左個梨園俾個仔買樓(又一個成功靠父幹的故事)。一個正常嘅香港人,有錢嘅話一定係買樓收租,點可能去投資一個係4000幾公里以外嘅農場,自己仲要冇任何農業知識。但係睇完木村阿公的故事「這一生,至少當一次傻瓜」,所以我都決定要儍一次。其實都有兩個原因驅使我呢個決定,第一系香港呢筆錢連買個客廳都未必夠,但係系喺呢度可以買到超過1,000,000尺而且仲可以成為一盤生意嘅農場(當然賺蝕唔知,但係我覺得比做收租佬更有意義);第二喺農場生活過嘅話,你可能會明白對住啲樹簡單得多(如果你見識過職場上面嘅暗黑兵法),最起碼你對佢好佢對你好,D農作物從來冇偷過懶,亦都唔會呃你。

 

我嘅故事就糸呢到開始⋯⋯下一集再同大家分享。

broken image